Psa 13 | AmhNASV | STEP | ለመዘምራን አለቃ፤ የዳዊት መዝሙር። እግዚአብሔር ሆይ፤ እስከ መቼ ድረስ ለዘላለሙ ትረሳኛለህ? ፊትህንስ ከእኔ የምትሰውረው እስከ መቼ ድረስ ነው?

Psalms 13

በአምላኩ የታመነ ሰው አቤቱታ

ለመዘምራን አለቃ፤ የዳዊት መዝሙር።

1 እግዚአብሔር ሆይ፤ እስከ መቼ ድረስ ለዘላለሙ ትረሳኛለህ?
ፊትህንስ ከእኔ የምትሰውረው እስከ መቼ ድረስ ነው?
2 ከሐሳቤ ጋር የምሟገተው፣
ልቤም ቀኑን ሙሉ የሚያዝነው እስከ መቼ ነው?
ጠላቴስ በእኔ ላይ የሚያይለው እስከ መቼ ድረስ ነው?

3 እግዚአብሔር አምላኬ ሆይ፤ ተመልከት፤
ስማኝም፤
የሞት እንቅልፍ እንዳልተኛ ዐይኖቼን አብራ፤
4 በዚህም ጠላቴ፣ “አሸነፍሁት” እንዳይል፣
ባላጋራዎቼም በውድቀቴ ደስ እንዳይላቸው ርዳኝ።

5 እኔ ግን በጸናች ፍቅርህ እታመናለሁ፤
ልቤም በማዳንህ ደስ ይለዋል።
6 ቸርነቱ በዝቶልኛልና፣
ለእግዚአብሔር እዘምራለሁ።